السحاب
أشاد المخرج محمد سامي بالفنانة منى زكي، واعتبرها “النجمة الأهم والموهبة الأكبر” في جيلها، مؤكداً أنها حالة فنية استثنائية يصعب تكرارها.
وكتب سامي عبر حسابه الرسمي على فيسبوك:
“كنت بتكلم مع منى زكي وبسلم عليها وقعدت أتكلم معاها شوية، وبعد ما قفلت سألت نفسي: ليه منى زكي فارقة كتير؟ ليه عندها بريق من نوع خاص؟ ليه هي النجمة الأهم والموهبة الأكبر؟ رغم إن جيلها قوي وفيه زميلات نجوم كبار وموهوبين وقدموا أعمال مهمة، لكن محدش وصل إنه يبقى منى زكي. ليه فضلت من أول يوم ليها كممثلة لحد النهاردة أيقونة يصعب تكرارها أو حتى الاقتراب من مكانتها الفنية والإنسانية وحب الجمهور ليها”.
وأضاف المخرج:
“منى زكي أكتر ممثلة ممكن تصدقها وتتوحّد معاها. مثقفة، متعلمة، راقية، متطورة، مش بتمثل وخلاص ولا بتركز في تفاصيل الناس الفاضية. ست كلامها مرتب، وأسئلتها ليها معنى وهدف. لما بتتكلم عن الفن تحب تسمعها، ولما توصفه تحس بالفخر إنك جزء من المهنة. منى عندها وعي، حكمة، حضور، وثقافة. ناجحة كفنانة، وزوجة، وأم”.
كما وصفها قائلاً:
“أي مشهد بتقدمه بيبقى مش عادي، وراه تحضير ومذاكرة ورؤية واضحة. بتعرف تبسط أصعب الأدوار وتقدمها بشياكة ومن غير تصنع. نقدها شيك، وطريقتها تعكس ثقتها بنفسها بلا حدود. حتى ظهورها الإعلامي، لقاءاتها، ندواتها، إعلاناتها، وأفلامها، دايمًا بتقدم صورة مشرفة للست المصرية”.
واختتم سامي منشوره قائلاً:
“الكلام عن عظمة منى زكي صعب يخلص في بوست. بعد ما خلصت كلامي معاها حسيت إني لازم أكتب قد إيه استمتعت بالنقاش معاها كالمعتاد. يا بخت الفن المصري والعربي بنجمة النجوم منى زكي، ويا بخت جيلها إنها جزء منه، ويا بخت الممثلات اللي بعدها إن عندهم قدوة يتعلموا منها. ربنا يديم على الفن نعمة منى زكي، وتفضل دايمًا ناجحة ومتفوقة، وبتحببنا أكتر في مهنتنا. بحبك يا عظيمة
