أحمد السعدني يكشف سر لجوئه للطبيب النفسي في سن المراهقة: “كنت بحب ومش عارف أتجاوز”

فتح الفنان أحمد السعدني قلبه وتحدث بصراحة عن تجربة شخصية مرّ بها في سن صغيرة، دفعته لزيارة طبيب نفسي وهو في عمر الـ16 عامًا.

وقال السعدني خلال لقائه مع الإعلامي أنس بوخش في برنامج ABtalks:

“كنت بحب واحدة جدًا ومكنتش قادر أتجاوز الموضوع، فروحت لطبيب نفسي. رحت له مرة واحدة وماساعدنيش، لكن اتعلمت من التجربة دي إن مش عيب أطلب مساعدة من متخصص لو في حاجة مش قادر عليها. الفكرة جات لي كمان من إن أبويا وأنا صغير أخدني مرة لدكتور واتبسطت”.

وتحدث السعدني عن بعض المواقف في طفولته التي تركت أثرًا نفسيًا بداخله، موضحًا:

“وأنا صغير كنت بنام أنا وأختي في أوضة واحدة، وسريرها كان جنبه حيطة مرسوم عليها غابة مرعبة جدًا، حاجة مش مناسبة للأطفال، وده كان بيخليني مبعرفش أنام”.

وأضاف:

“نفسية الطفل غريبة جدًا، وأوقات المشكلة تفضل ماشية معاك طول عمرك. أنا مثلًا بكره يوم عيد ميلادي، وباختفي ليلة عيد ميلادي الساعة 12، بقفل التليفون وما بردش على حد”.

وكشف عن سبب ذلك قائلًا:

“وأنا عندي 7 أو 8 سنين عملت عيد ميلادي في البيت في شهر يوليو، وقت أجازة المدارس، ومعظم أصحابي كانوا مسافرين. الحفلة بدأت الساعة 6 ولحد 8 ماجاش غير اتنين. نزلت الشارع أستنى الناس، وفي الآخر الحضور كله كانوا 3 بس. من يومها قررت إني مش هعمل عيد ميلاد تاني”.