حسام حبيب: بعت فيلتي وعربيتي وساعاتي عشان ماخدتش مليم لا من أهلي ولا من شيرين

رد الفنان حسام حبيب على ما يُثار حول اعتماده ماديًا على الفنانة شيرين عبد الوهاب، مؤكداً أنه لم يحصل منها على أي أموال، ولا من أسرته كذلك.

وخلال مداخلة هاتفية في بث مباشر مع الإعلامية بسمة وهبة عبر Instagram، قال حسام حبيب:
“هو أنا ما اشتغلتش قبل كده؟! عمري ما كنت عاطل، ومن وقت ما بدأت شغلي ماخدتش مليم من أهلي. حتى في جوازتي بعت فيلتي وعربيتي وساعاتي عشان ماخدش مليم لا من أهلي ولا من شيرين. أنا بصرف على نفسي، ولو ما اشتغلتش مش محتاج لشيرين ولا لأي حد، وربنا ما يحوجني لحد حتى لأهلي.”

وأضاف:
“الناس معذورين، سمعوا كلام مش حقيقي في أوقات معينة.. حتى شيرين نفسها ساعات بتقول كلام في عصبيتها زي الطفل لما يغضب، وبعدها بتهدى.”

وتحدث حسام حبيب عن معاناة شيرين قائلاً:
“شيرين مفتقدة كل حاجة.. الحنية والأهل والناس الكويسة، لأن الوحشين أكتر. أقسم بالله هي مظلومة من اللي حواليها. في شر أنا مشوفتوش في حكايات ولا روايات ولا حتى في التاريخ. دايماً بتسألني سؤال واحد: ليه؟! الأذى بيجي لها من أقرب الناس، وكل حد أحسنت له عمل لها مشاكل. حتى اللي أحسنت لهم بيطلعوا كلام عشان يبعدوا عنها.”