السحاب
كشف الفنان أوس أوس عن موقف صعب تعرض له خلال سفره إلى أوروبا لتصوير فيلم “رمسيس باريس”، حيث تم احتجازه في إيطاليا بالخطأ.
وأوضح أوس أوس، خلال لقائه في بودكاست “فضفضت أوي” مع معتز التوني، تفاصيل ما حدث قائلا:
“لما كلّموني على فيلم رمسيس باريس وكان عندهم مشكلة إن محمد ثروت مش هيقدر يسافر، قالولي أرجوك تعالى. بالفعل طلعت فيزا شينجن، وصبغت شعري أزرق وجهزت نفسي. ولأن الفيزا كنت مطلعها على إيطاليا، سافرت هناك الأول قبل ما أروح باريس”.
وأضاف:
“وصلت مطار إيطاليا يوم 2 يناير، المطار كان فاضي بسبب كورونا. أول ما دخلت سألني موظف ليه جاي هنا، رديت إني كل سنة باجي إيطاليا، ومقولتش إني ترانزيت لفرنسا عشان عايز أخد ختم دخول. بعدها جه ضابط وأخدني ومعاه الباسبور، لقيت نفسي في أوضة مليانة ناس محبوسة، ومفيش ولا عربي”.
وأشار أوس أوس إلى أنه اكتشف أن المشكلة كانت بسبب نوع الفيزا:
“كنت واخدها سياحة، لكن البلد كانت مقفولة وقتها، واللي معايا كلهم معاهم إقامة أو دراسة. الضباط طلبوا مني أتواصل مع صديقي، ومعنديش رصيد، فوصّلوا موبايلي بإنترنت المطار، وكلمت موظف في القنصلية المصرية هناك. الراجل شرح للضابط إني ممثل مصري جاي أصور فيلم في باريس. بعدها ختمولي الباسبور وسمحولي أقعد يومين”.
يذكر أن فيلم “رمسيس باريس” يشارك في بطولته: هيفاء وهبي، محمد سلام، محمد ثروت، حمدي المرغني، محمود حافظ، مصطفى خاطر، أوس أوس، جومانا مراد، سميرة مقرون، مصطفى البنا، أحمد كشك، سامي مغاوري، وهو من تأليف كريم حسن بشير، إخراج أحمد خالد موسى، وإنتاج ريمون رمسيس وأحمد خالد موسى.
