السحاب
وجهت الإعلامية والفنانة ميار الببلاوي رسالة قوية للمتنمرين الذين علقوا بسخرية على حفل خطوبة ابنها، مؤكدة أنها لن تسامحهم على ما بدر منهم.
وقالت خلال برنامجها “أنا حوا” عبر قناة الشمس:
“من كام يوم كان فرحنا بخطوبة ابني، الجو كله كان مليان حب وضحك، والناس فرحت معانا من قلبها. لكن وسط كل دا ظهر الجزء التاني اللي للأسف بقينا بنشوفه كتير على السوشيال ميديا: تعليقات سلبية على العريس والعروسة، أو شكل الفرح، أو تفاصيل صغيرة ملهاش أي علاقة بيهم زي لون الفستان أو ديكور القاعة”.
وأضافت:
“اللي ضايقني أكتر إن في ناس علقت على إن وقعت في نص اليوم واتعورت في ركبتي. ناس خدت الموضوع هزار وقالت كلام لطيف، لكن أنا فعليًا كنت بتألم جدًا ومكسوفة أوقف الحفلة عشان ما أعكرش فرحة ابني. كل همي محدش يحس عشان ما أضايقش العريس ولا العروسة”، مؤكدة أنها بكت بعد الحفل بسبب تلك التعليقات.
وكشفت ميار تفاصيل ما حدث:
“الدانس فلور كان فيه كسر في الإزاز، وحطوا كراسي حوالينه عشان محدش يقع. أنا ما كنتش واخدة بالي، ولما حاولت أرفع كرسي واقع وقعت بجسمي كله واتعورت جامد في ركبتي. في ناس قالت إني بمثل أو بعمل كدا عشان التريند أو أشيل العين، لكن الحقيقة إني كنت مصابة فعلًا، وكل همي ما أبينش لابني عشان ما أفسدش فرحته”.
وفي ختام حديثها، شددت ميار:
“أنا مش مسامحة أي حد تنمر أو كتب تعليق جارح.. الكلمة بتجرح وبتكسر القلب، وياريت كل واحد قبل ما يكتب تعليق يسأل نفسه: الكلمة دي هتضيف ولا هتأذي؟”.
