السحاب
تحدث الفنان محمد حماقي عن موقفه من دخول مجال التمثيل، موضحًا سبب تأخر هذه الخطوة في مشواره الفني رغم العروض التي تلقاها منذ بداياته.
وقال حماقي في حواره مع برنامج ET بالعربي:
“بالنسبة للتمثيل، هو مشروع بحلم بيه من زمان، ومن أول ما بدأت أغني، وتحديدًا من وقت أغنية بتضحك، اتعرض عليا كتير أفكار ومشاريع، لكن ماكنتش حاسس إنها اللي أنا نفسي أعمله أو الفكرة اللي بتشبهني. يمكن لأني مش متخصص في المجال ده بالشكل الكافي”.
وأضاف:
“في الموسيقى، بقدر أعمل اللي أنا عايزه، بفكر وأنفذ بحرية، لكن في السينما الوضع مختلف، أنا مش هقدر أكتب الفيلم، وده جزء من اللي موقف المشروع. أتمنى إني أقدم عمل سينمائي قبل ما المشوار يخلص، لكن في نفس الوقت مش هعمل أي حاجة لمجرد التواجد في السينما. لازم أكون مقتنع تمامًا، ومستني الفكرة اللي تلمسني، ولو جت، أكيد مش هتردد”.
وخلال اللقاء، كشف حماقي عن مشروع فني مختلف يعمل عليه منذ سنوات، قائلاً:
“أنا بشتغل على فيلم وثائقي عن مسيرتي الفنية بقالنا فترة طويلة، مش أقل من 10 سنين، وإحنا بنوثق فيه مراحل كتير من حياتي الفنية. المشروع ده مش مجرد توثيق للمشوار، هو حاجة متأسسة من بدري جدًا، وكل فترة بنقول خلاص هنقفله، وبعدين نقرر نضيف مراحل أو أحداث جديدة”.
واختتم حماقي حديثه قائلاً:
“الفيلم لسه مشروع مفتوح، ومخدناش قرار نهائي إحنا هنقفله إمتى، لكن أكيد لما يكتمل هيكون حاجة غنية ومليانة تفاصيل مهمة من حياتي الفنية”.
