السحاب
عبّر الفنان محمد علي رزق عن سعادته البالغة بمشاركته في مسلسل “الاختيار”، واصفًا التجربة بأنها حلم فني وإنساني تحقق، وأن مجرد الظهور في هذا العمل يُعد شرفًا لأي فنان، لما يحمله من قيمة وطنية وتوثيق لمرحلة مهمة من تاريخ مصر.
وقال رزق خلال لقائه في برنامج “الستات ما يعرفوش يكدبوا” على قناة CBC:
“أول ما جالي الدور وافقت فورًا، حتى لما قالي إنه ضيف شرف قلت مش مشكلة.. لأن التجربة ما تتعوضش، وخصوصًا إن قبله كان في (الاختيار 1 و2)، وكنت أتمنى أكون موجود فيهم.”
وأوضح أن ردود الأفعال على مشاركته كانت قوية ومؤثرة، قائلاً:
“إحنا كنا في الساحل والنت اتقطع، أختي كانت بتدور على الحلقة في أي حتة.. الكل كان بيتكلم عن مشهد ‘فات الميعاد’، قلب الدنيا، وأنا بدأت أشوفه بنفسي والحمد لله، نفسي أكمل الحلقات كلها.”
وعن تعاونه مع الفنان أحمد السقا، قال:
“أنا فخور إني اشتغلت معاه، وده مش أول مرة.. اشتغلنا قبل كده في (هروب اضطراري) و(من 30 سنة)، وهو إنسان جميل وبني آدم نظيف وبيحتوي اللي حواليه، وبيكبر كل حد معاه في الشغل.”
كما تحدث عن تعاونه مع المخرج بيتر ميمي، مشيرًا إلى أنه يعتبره شريك نجاح حقيقي، قائلاً:
“اشتغلت مع بيتر قبل كده في (الأب الروحي) و(حرب كرموز) و(كلبش 3)، وهو مش بس مخرج شاطر، هو كمان من الناس اللي بحس معاهم براحة واندماج في الشغل.. وكان في انسجام كبير بينا في كواليس مشهدي في المسلسل.”
واختتم محمد علي رزق تصريحاته قائلاً:
“مسلسل (الاختيار) مش مجرد عمل درامي، ده عمل بيوثق تاريخ وبيخلد الفنان في وجدان الناس.. الأعمال الصادقة دايمًا بتعيش وبتسيب بصمة وطنية حقيقية.”
