السحاب
علّق الفنان رامي جمال على الجدل الذي أثاره توقيت طرح ألبومه، والذي جاء قبل أيام من صدور ألبوم الفنان الكبير عمرو دياب، مؤكدًا أن الهضبة في مكانة مختلفة لا يمكن مقارنته بأحد.
وقال رامي جمال خلال لقائه في برنامج “أجمد 7” مع جيهان عبد الله عبر إذاعة نجوم FM:
“عمرو دياب لا يُنافس، لأنه ببساطة حفر لنفسه تاريخ أسطوري. علشان تتكلم عن منافسته محتاج 40 أو 50 سنة من النجاح المتواصل، وساعتها الجمهور هو اللي يقرر. وأنا شخصيًا واحد من جمهوره المتعصبين، لأن في ناس بتحب المزيكا بشكل عام، فبتسمع رامي جمال وعمرو دياب وغيرهم”.
وأضاف أن فكرة “المنافسة” لم تعد كما كانت في الماضي، موضحًا:
“زمان أيام مبيعات الشرائط والسي دي كان فيه منافسة شرائية فعلًا، وكان الجمهور بيختار يشتري ألبوم واحد. لكن دلوقتي في عصر الأونلاين، الجمهور بيسمع اللي يعجبه، ممكن ياخد أغنية من هنا وأغنية من هنا”.
وتابع:
“أنا فعلاً نزلت ألبومي قبل عمرو دياب وكنت متصدر تريند اليوتيوب، ولما نزل عمرو دياب تصدّر هو، وده شرف ليا، لأن اللي أخد مني التريند هو صاحب الشغلانة والأسطورة الحية اللي إحنا عايشين في عصره. أنا حلمت كتير أوصل للمكانة دي، وكوني موجود في نفس التوقيت ده شرف مش مقارنة”.
كما وجّه رسالة إلى جمهور الفنانين، وخصوصًا المتعصبين منهم، قائلاً:
“إحنا شغالين في مزيكا علشان نبهجكم ونوصل لكم فن حلو، فانبسطوا وما تحولوش الأمر لصراعات. حتى لو كتبت تعليق سلبي مش هتضايق، لأن الهدف من شغلنا إنكم تستمتعوا”.
وختم رامي جمال حديثه مؤكدًا فخره بتجربة ألبومه الأخيرة، قائلاً إنه تلقى الكثير من ردود الفعل الإيجابية من الجمهور، مضيفًا:
“زي ما في ناس قالت إزاي تنزل ألبومك مع عمرو دياب، في ناس تانية كتير قالت إن الألبوم حلو وكل أغانيه جميلة، وده اللي يهمني في النهاية”.
